Karimnagar District : అడ్డొస్తే అంతు చూడటమే....! బరితెగిస్తున్న ఇసుక మాఫియా..!

Sand Mafia in Karimnagar : రాష్ట్రంలో ప్రభుత్వం మారినా ఉమ్మడి కరీంనగర్ జిల్లాలో ఇసుక దందా పంథా మారడం లేదు. క్షేత్ర స్థాయిలో వేళ్లూనుకుపోయిన మాఫియా.. దర్జాగా దౌర్జన్యానికి పాల్పడుతోంది. ఇసుకాసురుల పై కఠిన చర్యలు లేక రెచ్చిపోతున్నారు.

అక్రమ రవాణాతో జేబులు నింపుకొంటూ అడొచ్చిన వారిపై దాడులకు పాల్పడుతున్నారు. మానేరు, మోయతుమ్మెద, మూల వాగులు, గోదావరి నది పరీవాహక ప్రాంతాల నుంచి రాత్రింబవళ్లు సహజ వనరులను దోస్తున్నారు. ఉమ్మడి జిల్లావ్యాప్తంగా నిత్యం దాదాపు 4 వేలకు పైగా ట్రాక్టర్లలో టన్నుల కొద్దీ ఇసుక తరలిస్తుండటంతో ఆందోళన కలిగిస్తోంది.

ఈ సంఘటన ముస్తాబాద్ మండలం నామాపూర్ లో జరిగింది. గోపాల్ పల్లె తండాకు చెందిన భూక్య గురుబాబు ఇసుక దందా చేస్తున్నాడు. రాత్రివేళ అక్రమంగా మానేరు వాగు నుంచి ఇసుక రవాణా చేస్తున్నారన్న సమాచారంతో ఎస్సై శేఖర్ రెడ్డితోపాటు పోలీసు సిబ్బంది రైడ్ చేసి నామాపూర్ శివారులో ఐదు ట్రాక్టర్లను పట్టుకున్నారు.

ఒక్కో ట్రాక్టర్ పై ఒక్కో పోలీస్ ను బందో బస్తుగా పెట్టి ఠాణాకు తరలించే ప్రయత్నం చేశారు. చివరి ట్రాక్టర్ పై కానిస్టేబుల్ సత్యనారాయణ కూర్చుని స్టేషన్ కు వెళ్తుండగా ట్రాక్టర్ నడుపుతున్న గురుబాబు ఠాణాకు తీసుకెళ్ళవద్దంటూ కానిస్టేబుల్ తో వాగ్వివాదానికి దిగాడు. మేళ్లచెరువు కట్టపైకి రాగానే ట్రాక్టర్ వేగం పెంచి చెరువులోకి తిప్పి.. గురుబాబు దూకి పరారయ్యాడు.

ట్రాక్టర్ చెరువులోకి దూసుకుపోయి నీటిలో బోల్తాపడింది. కానిస్టేబుల్ సత్యనారాయణకు తీవ్రగాయాలయ్యాయి. స్టేషన్ కు ట్రాక్టర్ ఎంతకీ రాకపోవడంతో ఎస్సైతో పాటు సిబ్బంది వెనక్కివచ్చి చూడగా.. చెరువులో కానిస్టేబుల్ ఆర్తనాదాలు వినిపించడంతో వెలికి తీసి కరీంనగర్ కు తరలించారు. పరిస్థితి సీరియస్ గా ఉండడంతో హైదరాబాద్ కు తరలించారు.

ఇప్పటికే ఓ హత్య కేసులో నిందితుడైన గురుబాబుపై రౌడీషీట్ తో పాటు 13 కుపైగా ఇసుక అక్రమ రవాణా కేసులు ఉన్నాయని వెల్లడించారు. మిగతా నాలుగు ట్రాక్టర్ల డ్రైవర్లను అరెస్టు చేసి రిమాండ్ కు తరలించినట్లు ప్రకటించారు.

రెండు రోజుల కిందట వేములవాడ మూల వాగు నుంచి ఇసుకను తరలిస్తుండగా అడ్డుకున్న మైనింగ్ అధికారితో ట్రాక్టర్ల డ్రైవర్లు దురుసుగా ప్రవర్తించారు. ఇసుక ట్రాక్టర్ లను అడ్డుకునేందుకు యత్నించగా ఆపకుండా అడ్డుకునే మైనింగ్ అధికారుల పైకి తీసుకెళ్లేందుకు యత్నించారు. తమకు అడ్డురావద్దంటూ అధికారితో వాగ్వాదానికి దిగారు.

డీజిల్, కూలీల ఖర్చులు పోగా ట్రాక్టర్ ఇసుక విక్రయంతో రూ.1500-2000 సంపాదన వస్తుండటంతో చాలా మంది ఈ వ్యాపారానికి అలవాటు పడ్డారు. నది, వాగు పరీవాహక ప్రాంత గ్రామాల్లో వందల సంఖ్యలో ట్రాక్టర్లను కేవలం ఇసుక రవాణా కోసమే కొనుగోలు చేస్తున్నారు.

పోలీసు, రెవెన్యూ అధికారుల ఉదాసీనతకు తోడు స్థానిక నాయకుల అండతో దందా కొనసాగుతోంది. మొక్కుబడిగా కేసు నమోదు చేసి వదిలేస్తున్నారు. వాస్తవానికి వాల్టా చట్టం ఉల్లంఘించే వారిపై కఠిన చర్యలు తీసుకోవాల్సిన అవసరం ఉంది.

కరీంనగర్ జిల్లాలో 52 కేసులు నమోదు చేసి 242 ట్రాక్టర్లను సీజ్ చేశారు. జగిత్యాల జిల్లాలో 47 కేసుల నమోదు చేసి 80 ట్రాక్టర్లను సీజ్ చేశారు. సిరిసిల్ల జిల్లాలో ఎక్కువ కేసులు ఎక్కువ ట్రాక్టర్ లు సీజ్ అయ్యాయంటే ఏ స్థాయిలో అక్కడ అక్రమదందా సాగుతుందో ఇట్టే అర్థమవుతుంది. ఈసారి ఎన్ని కేసులు పెట్టారు.. ఎన్ని ట్రాక్టర్లు సీజ్ చేశారనేది అధికారుల వద్ద సరైన లెక్కలు లేవు. అంటే వారి నిర్లక్ష్యం ఏ స్థాయిలో ఉందో అర్థం అవుతుంది.

ఉమ్మడి జిల్లాలో ఏటా ఇసుక ట్రాక్టర్లతో దాదాపు 200 వరకు ప్రమాదాలు జరుగుతున్నాయి. పలు ఘటనల్లో ద్విచక్రవాహనదారులు మృత్యువాత పడ్డారు. ఇప్పటికైనా రెవెన్యూ, పోలీసు, ఆర్టీఏ, మైనింగ్ శాఖల అధికారులు స్పందించి సమష్టిగా ఇసుక దందాకు అడ్డుకట్ట వేయకుంటే మున్ముందు మరింత రెచ్చిపోయే ప్రమాదం లేకపోలేదని ఉమ్మడి జిల్లా ప్రజలు భావిస్తున్నారు.

రిపోర్టింగ్: కె.వి.రెడ్డి ఉమ్మడి కరీంనగర్ జిల్లా కరస్పాండెంట్ హిందుస్థాన్ టైమ్స్ తెలుగు.