రెస్టారెంట్ నుంచి ఆర్డర్ చేసిన చికెన్ బిర్యానీలో పురుగులు: నెటిజన్ల స్పందన ఇదీ

చనిపోయిన ఎలుకలు, కీటకాలు, పురుగులు.. ఇవి ఇప్పుడు ప్రజలు ప్రయాణిస్తున్నప్పుడు లేదా ఇంటి నుంచి ఆర్డర్ చేసిన ఆహారంలో కనుగొనే విషయాలు.

తాజాగా స్విగ్గీ ద్వారా హైదరాబాద్ కూకట్‌పల్లి లోని ఓ రెస్టారెంట్ నుంచి ఆర్డర్ చేసిన బిర్యానీలో చికెన్ ముక్కల్లో పురుగులు ఉన్నట్లు ఓ వ్యక్తి గుర్తించాడు.

హైదరాబాద్ కూకట్ పల్లిలోని మెహఫిల్ బిర్యానీలో కలుషితమైన బిర్యానీ ఫొటోలను సాయితేజ అనే వ్యక్తి తన సోషల్ మీడియా హ్యాండిల్ ఎక్స్ లో పోస్ట్ చేశాడు.

ఈ ఘటనపై స్విగ్గీకి ఫిర్యాదు చేసిన తర్వాత ఆ ఆన్‌లైన్ ఫుడ్ అగ్రిగేటర్ నుంచి మొత్తం రూ. 318 బిల్లులో రూ. 64 రీఫండ్ ఇస్తామని సమాధానం వచ్చిందని తేజ పేర్కొన్నారు.

దీనిపై స్విగ్గీ స్పందిస్తూ.. 'మీ ఆర్డర్ అంచనాలను అందుకోనందుకు చింతిస్తున్నాం. ప్యాకేజింగ్ పూర్తిగా రెస్టారెంట్ ద్వారా నిర్వహించబడుతుంది." అని పేర్కొంది.

స్విగ్గీని ట్యాగ్ చేయడమే కాకుండా రెస్టారెంట్ పై అసంతృప్తితో ఉన్న తేజ @cfs_telangana ను ట్యాగ్ చేశాడు.  'మెహఫిల్ కూకట్ పల్లి నుంచి ఆర్డర్ చేయవద్దు' అని రాశాడు.

ఫుడ్ సేఫ్టీ అండ్ స్టాండర్డ్స్ అథారిటీ ఆఫ్ ఇండియా (ఎఫ్ఎస్ఎస్ఏఐ) వెబ్‌సైట్ ద్వారా ఫిర్యాదు చేయడానికి తేజ ప్రయత్నించాడు. కానీ అతను ఒక అడ్డంకిని ఎదుర్కొన్నాడు. "అవసరమైన సమాచారాన్ని నమోదు చేసినప్పటికీ, అదనపు వివరాలను నింపమని వెబ్‌సైట్ నన్ను ప్రేరేపిస్తోంది" అని పేర్కొన్నాడు.

ఇదిలా ఉంటే మెహఫిల్ బిర్యానీ ప్రముఖ స్టాండప్ కమెడియన్ జకీర్ ఖాన్ కి చెేందినది. కాగా తేజ ట్వీట్‌కు 771.9కే వ్యూస్ రాగా, నెటిజన్లు ఇంకా కామెంట్లు చేస్తున్నారు. ‘‘మెహఫిల్ - నిజాంపేట కూకట్ పల్లిలో పనీర్ బిర్యానీ ఆర్డర్ చేశాను’’ అని ఒకరు రాశారు. ‘మెహఫిల్ బిర్యానీ (జేఎన్టీయూ సమీపంలో) తినేవాడినని, హైదరాబాద్లో ఉన్న సమయంలో ప్రతిరోజూ ఈ బిర్యానీ తినేవాడిని. వారు ఇలా చేస్తారని నాకు తెలియదు..’ అని మరొకరు రాశారు. 

"ఆ దుకాణాన్ని శాశ్వతంగా మూసివేయాలి" అని మరొక యూజర్ రాశారు. ‘సోషల్ మీడియా లేకపోతే ఏమవుతుంది?' అని ఒకరు కామెంట్ చేశారు. స్విగ్గీ మరియు హోటల్ రెండూ ఫిర్యాదును పట్టించుకోకుండా తదుపరి కస్టమర్లకు ఆహారాన్ని డెలివరీ చేయడం ప్రారంభిస్తాయి! మన చుట్టూ ఏం జరుగుతోందో ఇతరులకు తెలియజేయడానికి కనీసం సోషల్ మీడియా ఏదో ఒక విధంగా ఉపయోగపడుతుంది..’ అని ఇంకొకరు వ్యాఖ్యానించారు.

"నేను అదే సమస్యను ఎదుర్కొన్నాను. ఆహారంలో పదునైన ప్లాస్టిక్‌ను కూడా కనుగొన్నాను. స్విగ్గీ కేవలం విక్రేతలతో వ్యాపారంపైనే దృష్టి సారించినట్లు కనిపిస్తోంది' అని ఓ యూజర్ కామెంట్ చేశారు.